La storia
Cörta storia dla scora elementara Al Plan de Mareo
L’ann 1984 èl gnü fat sö ia en “Chi Parüsc” na costruziun nea dla scora elementara. Da d’altonn, l’ann 1987 à i scolars podü jí tla scora nea. Dötaorela va i scolars y i maestri te cösta scora, a scora.
Ćina l’ann 1987 è i scolars d’Al Plan jüs tla scora vedla. La scora vedla sta tal zënter dal paîsc y è gnüda dorterada l'ann 2012. Eniann, l'ann 2013 ésera gnüda daorida por la scora dla musiga.
Storia dla Scora d'La Plì
La Scora d'La Pli, la pröma scora dla Val Badia, dess ester gnüda metüda sö dal ploan y degan Pire Ghedina l'ann 1653. I pröms maestri ea samben prei y capolagn. Dô che la dlijia à por cionć d’agn plü o manco manajé la scora, è la situaziun müdada, can che la monarchia de Habsburg, l’ann 1869, ti à dé na fin a cösc monopol tolenn enstessa la scora tles mans. Cösc fat à spo condüt al “Enneberger Schulstreit”, olà che la dlijia proâ a ries da se tignì cösta istituziun y se metèa dassenn cuntra l’aboliziun dal talian te scora. En tramont emplü, en cösc iade por l’aboliziun dal todesch, à la scora ladina mossü soporté dô la Pröma Vera, can che le stato talian proâ a vigne moda da italianisé Südtirol.
I salamonć de scora ea plüdadio tal paiun, tla Granciasa y te ćiasa dal mone. Le fabricat, olà che la scora è aldedancö, è gnü fat sö dal 1964 y sorandé ala scora dal 1965. Cösta ćiasa dla scora è spo gnüda ristruturada l’ann 2000, olà ch'al è gnü laprò na palestra y en bel salamont luminus da pastlené. Inće la scolina è enlò spo endô gnüda metüda sö y à ciafé lerch te cösc fabricat. La scora porta l’ennom dal gran maester Jepele Frontull, orghelist, mone y componist.
Eniann cumpeda la scora 47 scolars, partîs sö te 5 tlasses.
Storia dla scora da Lungiarü
Lungiarü á ciafé süa pröma scora impormó l’ann 1782, 100 agn do che la curazia ê gnüda metüda sö (1680). Le pröm local de scora ê te ostaria dl paisc (“Ciasa de Comel”), spo gnôl fat sö por la scora na ciasa da öna na alzada döta de lëgn. Incër l’ann 1850 gnôra spo fata de mür. L’ann 1890 gnôl fat na secunda alzada lassura, cun cuartiers por le mone y le maester, n valgünes ciamenes da afité ia y cianos por la dlijia.
I agn 1904 y 1930 êl indô gnü lauré pro chësta costruziun, mudé y fat pormez.
L’ann 1992 él spo sté le comun da San Martin de Tor che á fat sö n bel frabicat nü che ospitëia incö no ma la scora cun n salf polivalënt, mo ince na scolina, n ambulatorium, la calonia y i Stödafüch. La scora vedla é le medem ann gnüda trata jö.
Porsones de scora da recordé: Jan Matî Pescoller da Pespach, pröm caplan-maester de scora, le mone-maester berba Vijo Pezzei (Pitscheider) ch’á tigní scora por bëgn 50 agn, le mone-maester berba Sepl Dapoz da Lungiarü ch’á tigní scora por 49 agn, Maria Daporta da Mazechel da Lungiarü (1886-1945), gran ciantarina, ch’á tigní scora ince a Antermëia y por tröc agn a Al Plan de Mareo. Da recordé él ince le professur siur Ojöp Mischí (1846-1918) da Miscí da Lungiarü che é sté por 24 agn ispetur dles scores ladines dla Val Badia.
Giovanni Miscí